Kapitulli 12: Politikat e Sigurisë Ushqimore, Veterinarisë dhe Mbrojtjes së Bimëve

Ky kapitull përfshin rregulla të hollësishme në fushën e sigurisë së ushqimit , vendosjen e rregullave për mbrojtjen e konsumatorit, higjenën dhe paraqitjen e produkteve ushqimore, kontrollet dhe mekanizmat për garantimin e sigurisë së ushqimit, etj. Ai gjithashtu përfshin aspektet e higjenës që lidhen me përpunimin dhe vendosjen në treg të produkteve ushqimore, veçanërisht të ushqimit me origjinë shtazore. Për më tepër, ky acquis rregullon tregtinë ndër-komunitare (brenda Bashkimit Evropian) të kafshëve të gjalla dhe produkteve shtazore, kontrollin e sëmundjeve të kafshëve dhe aspekte të tjera që lidhen me shëndetin dhe mirëqenien e kafshëve. Në fushën e mbrojtjes së bimëve, acquis vendos rregulla gjithëpërfshirëse në lidhje me kontrollin e organizmave të dëmshëm ndaj bimëve dhe produkteve bimore, përdorimin e pasaportës së bimëve në tregtinë e bimëve të destinuara për mbjellje, procedurat për autorizimin e produkteve për mbrojtjen e bimëve, masat e karantinës, mbetjet e pesticideve të përdorura për prodhimin e bimëve, tregtimin dhe kualifikimin e farës dhe fidanëve.